У 1993 годзе Сусветнай арганізацыяй аховы здароўя кастрычнік абвешчаны Сусветным месяцам барацьбы з ракам грудзей, а 15 кастрычніка – Сусветным днём барацьбы з ракам грудзей. Асноўнай мэтай правядзення гэтага Дня з’яўляецца прыцягненне ўвагі насельніцтва і грамадскасці да праблем, звязаных з анкалагічнымі захворваннямі малочных залоз, павышэнне асвечанасці насельніцтва наконт падыходаў да прафілактыкі, ранняга выяўлення і лячэння гэтай паталогіі.
У Брэсцкай вобласці ў перыяд з 12.10.2026 па 16.10.2026 года праводзіцца Тыдзень барацьбы з ракам малочнай залозы.
Ва ўсім свеце рак малочнай залозы ў структуры анкалагічных захворванняў жанчын займае першае месца, прычым захваральнасць пастаянна расце, што звязана як з павелічэннем працягласці жыцця, так і з паляпшэннем якасці дыягностыкі. Штогод у свеце выяўляецца каля 2,5 мільёнаў новых выпадкаў захворвання і каля 700 тысяч выпадкаў смерці ад раку грудзей (МАДР, Globocan, 2024 г.). Згодна з данымі Сусветнай арганізацыі аховы здароўя, рак малочнай залозы – найбольш распаўсюджанае анкалагічнае захворванне ў Еўропе і асноўная прычына смяротнасці ад раку сярод жанчын.
У структуры захваральнасці на злаякасныя новаўтварэнні жаночага насельніцтва Брэсцкай вобласці рак малочнай залозы займае лідзіруючыя пазіцыі. У апошнія гады ў вобласці штогод выяўляецца больш за 700 выпадкаў раку малочнай залозы, з іх больш за 90% усіх выпадкаў раку малочнай залозы дыягнастуецца ў жанчын пасля 40 гадоў, сярэдні ўзрост захварэлых – 61 год.
За апошнія 10 гадоў захваральнасць на рак малочнай залозы ўзрасла ў 1,2 раза. Нягледзячы на рост захваральнасці, смяротнасць ад раку малочнай залозы застаецца на адным узроўні, аднак у структуры смяротнасці жаночага насельніцтва рак малочнай залозы займае першае месца.
Навукоўцы даказалі, што ад моманту з’яўлення першай ракавай клеткі да яе клінічных праяўленняў пры раку малочнай залозы праходзіць 5-7 гадоў. На працягу ўсяго гэтага часу існуе значная верагоднасць поўнага вылячэння раку.
В анкалогіі вельмі важная ранняя дыягностыка – чым хутчэй выяўлена пухліна і пачата лячэнне, тым лепшыя вынікі. Пры выяўленні раку малочнай залозы на I стадыі верагоднасць поўнага вылячэння дасягае 95% і больш. Сучасныя метады дыягностыкі раку малочнай залозы дазваляюць выявіць гэтую паталогію на ранніх стадыях і праводзіць яе эфектыўнае лячэнне.
У Рэспубліцы Беларусь удзяляецца дастаткова вялікая ўвага прафілактыцы і ранняй дыягностыцы анкалагічных захворванняў. Вялікае значэнне маюць прафілактычныя агляды насельніцтва, састаўной часткай якіх з’яўляецца агляд малочных залоз з мэтай выяўлення злаякасных новаўтварэнняў і перадракавых захворванняў.
У цяперашні час у рамках Дзяржаўнай праграмы «Здароўе нацыі» на 2026-2030 гады ў краіне рэалізуецца праект «Прафілактыка і ранняя дыягностыка раку». Адным з напрамкаў Праекта прадугледжана выкананне мерапрыемстваў па ранняй дыягностыцы перадапухлінавых і пухлінавых захворванняў малочнай залозы ў рамках дыспансерызацыі. Абследаванню падлягаюць жанчыны ва ўзросце 49-58 гадоў, у якіх няма сімптомаў захворвання малочных залоз. Абследаванне ажыццяўляецца шляхам правядзення мамаграфічнага даследавання малочных залоз з кратнасцю 1 раз у 3 гады. Пры падазрэнні на захворванне малочнай залозы жанчыны накіроўваюцца ў анкалагічныя дыспансеры для далейшага абследавання.
У Год беларускай жанчыны асабліва актуальна правядзенне мерапрыемстваў, накіраваных на захаванне і ўмацаванне здароўя жаночага насельніцтва. Бо жаночае здароўе – гэта здароўе нацыі. І нават калі няма ніякіх сімптомаў захворвання, важна своечасова праходзіць дыягнастычныя абследаванні, не ігнараваць любыя нязвыклыя адчуванні або змены ў галіне малочных залоз і своечасова звяртацца да спецыяліста для правядзення дыягностыкі. Ранняя дыягностыка — залог паспяховага лячэння і захавання здароўя.
